د پاکستان ځايي چارواکو د یکشنبې په ورځ د دغه هیواد د ګمرک د دوو افسرانو د وژل کېدو خبر ورکړی. دا برید څو ورځې وروسته له هغه کیږي چې وسله والو په ورته برید کې د ګمرک پنځه افسران وژلي ول.

تر اوسه کومې ډلې د دغو دوو بریدونو مسوولیت نه دی منلی. پاکستاني پولیسو ویلي دي چې د دغو دوو بریدونو په اړه څیړنې کوي.

د سيمې د امنيه قوماندانۍ مرستيال محمد عدنان د پیښې په تړاو وويل: «کله چې نامعلومو کسانو ډزې وکړې، د ګمرک مامورين هلته د پلټنې لپاره ورغلي وو.» هغه زياته کړه: «درې ورځې وړاندې هم په همدې سيمه کې د ګمرک د يوه افسر په ګډون پنځه تنه په ډزو وژل شوي وو او بريد کوونکي تښتېدلي وو.»

وروسته له هغې چې طالبانو په افغانستان کې واک تر لاسه کړ، له دغه هېواد سره د پاکستان په سرحدي سیمو کې امنیت خراب شوی دی. هغه بریدونه، چې ځینې یې د پاکستاني طالبانو یا (TTP) لخوا کیږي، زیات شوي دي. دا ډله تر ډېره حکومتي چارواکي او د پاکستان امنیتي ځواکونه په نخښه کوي.

په وروستیو کلونو کې د بریدونو زیاتوالي د پاکستان او په افغانستان کې د واکمنو طالبانو تر منځ کړکیچ زیات کړی دی. پاکستان له طالبانو غوښتي چې په دې اړه  اقدام وکړي او وایي چې اورپکي د بریدونو لپاره د افغانستان خاوره کاروي، داسې ادعا چې په افغانستان کې طالبانو رد کړې ده.

طالبانو تل د افغانستان له خاورې د پاکستان د بریدونو لپاره کار اخیستل رد کړي او ویلي یې دي چې د دغه هېواد امنیتي مسایل د پاکستان کورنۍ مسله ده.